DOC, o robot de Clementoni para Educación Infantil
DOC recórdanos ao clásico Emilio. Con el, os nenos de 3 a 7 anos poden dar os seus primeiros pasos na programación e desenvolver o pensamento lóxico.
É exactamente igual ao BeeBot/BlueBot en canto ao seu funcionamento (cada paso son 15 cm.) pero co engadido de que interactúa de forma oral co xogador/a. Ademais, inclúe:
- un taboleiro desmontable de doble cara de 94×68 cm. Por unha cara temos un taboleiro (1) con letras, animais e cores (máis sinxelo); pola outra (2), un con obxectos e lugares (máis dificultade).
- 16 tarxetas direccionais de doble cara, para poder elaborar fisicamente as secuencias completas antes de darlle as indicacións a DOC.
- e 26 tarxetas de xogo, con indicacións de como chegar a cada cadro do taboleiro 1 (tarxetas vermellas) e desafíos a realizar no taboleiro 2 (tarxetas azuis).
Para comezar a xogar debemos colocar a DOC sempre no punto de inicio. Grazas a iso, DOC sabe onde se atopa en cada momento, podendo darnos indicacións do punto ao que nos temos que dirixir a continuación e dicíndonos se o fixemos ben ou se, pola contra, temos que volver a intentalo.
DOC ten 3 modos de xogo: free (libre, en calquera dos 2 taboleiros ou nos de creación propia, xa que neste modo non da indicacións orais), edu (no taboleiro 1, tendo que seguir as indicacións orais que nos da) e game (no taboleiro 2, tendo que realizar secuencias de máis complexidade).
Aquí vos deixo un vídeo para que o vexades en acción:
E, por último, o mellor: o seu prezo é de 29,95€. Sen lugar a dúbidas, dende o meu punto de vista, unhas das mellores opcións para utilizar nas aulas de Educación Infantil.
Realidade aumentada como autoavaliación
Todos os días, na clase de 4º de Infantil (3 anos), o encargado/a ten que encontrar o seu nome entre todos os da clase. Pero… como saben se realmente o nome que collen é o deles?
Grazas á app Aurasma (dispoñible para Android e iOS), que nos permite crear realidade aumentada ao noso antollo, eles mesmos poden autoavaliarse xa que lles aparecerá na tablet, como por arte de maxia (para eles é «o espelliño máxico») un vídeo do neno ou nena ao que pertence o nome.
Déixovos unha pequena mostra para que vexades como funciona:
Fontes de texto escolares para descargar
O curso pasado (grazas Lucía) descarguei un tipo de letra (a «ligada”) que non vén por defecto nos procesadores de texto e que me foi moi útil á hora de elaborar material para o alumnado de 6º de Educación Infantil (5 anos). Agora, acabo de descubrir unha fonte moi interesante para os de 4º de EI (3 anos) para repasar letras de puntiños e outra que simula escritura de nenos para utilizar en presentacións, dípticos, carteis…. Seguro que moitas de vós xa as coñecíades, pero para as que non, aquí vos deixo un exemplo de cada tipo de letras e os arquivos listos para descargar e instalar no voso ordenador (por se vos gustan e as vedes útiles para elaborar o voso material). Unha vez instaladas, xa as deberíades poder seleccionar en todos os editores de texto que teñades no PC.
Descarga aquí o arquivo para instalar a fonte Masallera.
Descarga aquí o arquivo para instalar a fonte Codystar.
Descarga aquí o arquivo para instalar a fonte kindergarten.
Esta última descargueina da web dafont.com, a cal vos recomendo para descargar outras fontes escolares ou de calquer tipo (artísticas, temáticas…). Nela podedes buscar por categorías (escolar, manuscrito, Halloween, natureza, música…) e encontrar fontes tan chulas como estas para o Nadal, por exemplo:
As competencias na Educación Infantil
Son as competencias un elemento prescritivo do currículo na etapa de Educación Infantil? Cales tomamos como referencia, as básicas ou as clave? Desenvolvémolas realmente nas nosas aulas?
Para contestar ás dúas primeiras cuestións basta con botar unha ollada á lexislación vixente. Primeiro, buscando no marco normativo da propia etapa (Real Decreto 1630/2006, Decreto 330/2009 e Orde do 25 de xuño de 2009) todo o que aparece relativo ás «competencias». E segundo, buscando na normativa máis recente sobre competencias (Orde ECD65/2015) o termo «educación infantil».
Para contestar á terceira pregunta, tal e como nos di a Orde do 25 de xuño de 2009, cada docente deberá avaliar a adecuación da súa proposta metodolóxica na contribución á adquisición das competencias básicas.
Todo isto foi o que tratamos nas xornadas organizadas polo CFR de Pontevedra Avaliar para ensinar a aprender que tiveron lugar en Pontevedra e Lalín. A continuación déixovos en PDF a parte relativa a Educación Infantil do noso relatorio: Avaliación de proxectos da CMCT na EI e EP (con Charo Martínez). Podedes ver a nosa presentación completa (coa parte de Primaria incluída) así como as do resto de relatores (Neus Sanmartí, Diego Ojeda e Manuel Torres) no seguinte enlace.
Colección de cromos de animais [galego]
Dado o seu interese polos cromos (da Liga de fútbol, de Yokai…), ocurréuseme crear unha colección para:
- Seguir avanzando no proceso de lectoescritura.
- Traballar sobre o abecedario.
- Coñecer as letras minúsculas.
- Aprender nomes de animais en galego.
- Investigar sobre os animais que veñen no álbum.
- Categorizar os animais segundo o seu nacemento (vivíparos e ovíparos) e a súa alimentación (herbívoros, carnívoros e omnívoros.
Xa que necesitábamos certa información, cada alumno levou para a casa unha ficha cun animal (as cales vos deixo a continuación) para investigar, polo menos, cómo nacía e de qué se alimentaba.
Unha vez cubertas, fixemos un libro para a biblioteca de aula.
Cada semana «chegan» 4 novos cromos que cada alumno colorea, recorta e pega no seu álbum para ir así completando a coleccción. Ese é o momento para que os nenos que investigaron sobre eses animais expoñan ao resto de compañeiros os seus descubrimentos.
Está resultando unha actividade moi motivadora xa que moitos nenos e nenas esperan con impaciencia a chegada de novos cromos ou algún cromo en particular («profe, cando vai chegar o unicornio?»). Si, unicornio (o resto son reais). En galego non encontrei ningún animal real que comezase por U!
Bandeiras de Europa en realidade aumentada
Con motivo da celebración do Día de Europa o 9 de maio (día de obrigada conmemoración segundo a Orde de calendario escolar), cada alumno/a coloreou unha bandeira dun país europeo e escribiu o nome do mesmo. Grazas á app Quiver, cando lles toque o recanto das TIC poden ver na tablet todas as bandeiras en realidade aumentada.
Déixovos un pequeno vídeo-resumo da actividade e o material necesario para levala a cabo.
Días da semana para a asemblea
Dende fai un mes, contamos cunha nova forma de ver na asemblea en que día da semana nos atopamos grazas a unha idea vista en Pinterest. Antes simplemente poñiamos o día, os cales estaban todos na mesma cor e nun tamaño máis pequeno. Estes son máis grandes, teñen máis colorido e engadimos os conceptos temporais que máis costa adquirir: onte, hoxe e mañá.
Agora, o encargado de cada día coloca as pinzas no lugar correspondente (mellorando de paso un pouquiño a motricidade fina).
Déixovos o arquivo listo para imprimir (en galego e en castelán) por se o queredes poñer nas vosas aulas.
Crea os teus propios xogos para tablet e PC
A app Tiny Tap, dispoñible tanto para iOS como para Android e tamén en versión web, permítenos crear xogos cos que despois vamos a poder divertirnos (e aprender) no noso recanto de aula adicado ás novas tecnoloxías, xa que poderemos xogar tanto nunha tablet (preferiblemente) como nun ordenador.
Ademáis de pola súa sinxeleza (é súper intuitiva e podemos grabar a voz ao instante coa tablet), destaca pola opción que nos da de facer os nosos xogos privados. Desta forma, podemos introducir nos xogos fotos e/ou voces do noso alumnado para que así sexan más significativos, coa seguridade de que só estarán dispoñibles para nós.
Mais se non tes tempo de crear o teu propio xogo, tamén podes xogar aos centos deles que outras persoas crearon e fixeron públicos, os cales aparecen na app organizados por idades e categorías.
Déixovos uns cantos exemplos dalgún dos xogos de creación propia aos que xogan no iPad no recanto das TIC:
1. Xogo con 24 pantallas (unha por cada alumno) na que teñen que ir seleccionando o nome do alumno/a que aparece na foto e do que escoitamos o seu nome (cada alumno grabouse dicindo o seu nome na pantalla na que aparece a súa foto):
2. Xogo no que temos que completar os nomes dos nosos compañeiros arrastrando as letras ao lugar correspondente:
3. Xogo no que lle poñemos voz aos nosos murais de clase. Cada alumno grabou unha palabra e agora podemos escoitar e aprender, de boca dos nosos compañeiros, qué pon en cada sitio con tan sólo premer na palabra que queremos escoitar.
Letras e robótica
Un dos moitos contidos que podemos traballar ao mesmo tempo que nos iniciamos na linguaxe de programación manexando o robot Blue Bot son as letras. Este panel permítenos facer moitas actividades, como por exemplo:
- Organización espacial (para montar o taboleiro, cada un ten que colocar unha letra no lugar que lle corresponde).
- Asociación de letras maiúsculas coas súas minúsculas.
- Creación de palabras (aprendendo así a orde na que van as letras das mesmas).
- Asociación fonema-grafema.
- Recoñecemento fonolóxico.
- Actividades relacionadas coas cores.
- E tódalas actividades que se vos ocorran.
Déixovos un vídeo do alumnado de 6º de Educación Infantil (5 anos) do CEIP do Carballal de Marín levando a cabo algunha destas actividades:
Tamén vos deixo un PDF con todas as celas do taboleiro, a imprimir en folios de cores, e as letras en branco para pegar enriba.
Profe dEI 